پٹرول ڈیزل کے دام میں دسویں روز بھی اضافہ... سونیا نے لکھا وزیراعظم کو خط

نئی دہلی 16 جون (یو این آئی و ایجنسیاں) آج مسلسل دسویں روز بھی پیٹرول ڈیزل کے دام میں اضافہ ہوا ہے اس سے ناراض سونیا گاندھی نے ملک کے وزیر اعظم کو خط لکھا ہے جس میں کانگریس صدر سونیا گاندھی نے کہا ہے کہ بین الاقوامی بازار میں خام تیل کی قیمتوں میں ریکارڈ کمی اور کووڈ۔ 19 وبا کے قہر کے دوران پٹرول اور ڈیزل کے دام بڑھانے کا حکومت کا فیصلہ حیران کن ہے اور وزیراعظم نریندر مودی کو عوامی مفاد میں اس فیصلے کو فوراً واپس لے لینا چاہیے۔ سونیا گاندھی نے منگل کو پی ایم مودی کو خط لکھ کر کہا کہ ان کی سمجھ میں یہ بات نہیں آرہی ہے کہ جب عالمی بازار میں خام تیل کے دام میں ریکارڈ کمی آئی ہے اور گزشتہ ایک ہفتے کے دوران تیل کی شرحوں میں تقریباً 9 فیصد کی گراوٹ آئی ہے۔ حکومت کو اس تیل سے بہت کمائی ہو رہی ہے لیکن وہ اس فائدے کو عوام میں تقسیم کرنے کے بجائے کورونا کی لڑائی لڑ رہے لوگوں پر اپنے فیصلے سے بلا وجہ بوجھ ڈال رہی ہے۔ انہوں نے حکومت کے اس فیصلے کو غیر حساس قرار دیتے ہوئے الزام لگایا کہ حکومت نے عوام کے مفاد کو طاق پر رکھ کر اپنے مفاد کے لئے تیل پر ایکسائز ڈیوٹی بڑھائی اور اس پر پٹرول اور وہ ڈیزل کی قیمتوں میں اضافہ کرکے تقریباً 260000 کروڑ روپے کا اضافی ریوینیو حاصل کرنے کی کوشش کر رہی ہے۔ ان کا کہنا تھا کہ حکومت یہ قدم ایسے وقت میں اٹھا رہی ہے جب ملک کے عوام ناقابل تصور مشکلات کا سامنا کر رہے ہیں جس کے سبب لوگ ڈرے ہوئے ہیں اور ان میں عدم تحفظ کے تاثر پیدا ہو رہے ہیں