ممتا نے انڈیا اتحاد کو دیا جھٹکا، اکیلے الیکشن لڑنے کا اعلان

کولکاتہ، 24 جنوری (ہندوستان سماچار)۔نریندر مودی حکومت کے خلاف متحد اپوزیشن جماعتوں کے انڈیا اتحاد کو بڑا جھٹکا لگا ہے۔ ترنمول کانگریس کی سربراہ ممتا بنرجی، جو اتحاد کا حصہ ہیں، نے بدھ کو اکیلے الیکشن لڑنے کا اعلان کیا۔مشرقی بردوان میں منعقد پروگرام کے دوران انہوں نے کہا کہ ان کی پارٹی بنگال میں کسی کے ساتھ اتحاد نہیں کرے گی بلکہ اکیلے الیکشن لڑے گی۔ ممتا کے مطابق، ٹی ایم سی بنگال میں کسی کے ساتھ تال میل نہیں کرے گی۔ بنگال میں کانگریس کی بھارت جوڑو نیا یاترا کے بارے میں کوئی اطلاع نہیں دی گئی۔ اور نہ ہی کانگریس نے اس بارے میں ان سے کوئی بات کی ہے۔

سی ایم ممتا نے کہا کہ ان کی طرف سے جو بھی تجاویز پیش کی گئیں انہیں مسترد کر دیا گیا۔ ٹی ایم سی سپریمو نے کہا کہ کانگریس کا مغربی بنگال سے کوئی لینا دینا نہیں ہے۔ ان کی تجویز پہلے ہی دن مسترد کر دی گئی۔ممتا بنرجی کے مطابق، میری کانگریس کے ساتھ کوئی بات چیت نہیں ہوئی۔ میں نے ہمیشہ کہا ہے کہ ہم بنگال میں اکیلے لڑیں گے۔ مجھے اس بات کی فکر نہیں ہے کہ ملک میں کیا ہوگا لیکن ہم ایک سیکولر پارٹی ہیں اور بنگال میں ہیں۔ ہم اکیلے ہیں۔ بی جے پی کو شکست دیں گے۔ ہم اتحاد کا حصہ تھے لیکن راہل گاندھی کی نیائے یاترا ہماری ریاست سے گزر رہی ہے لیکن ہمیں اس کی اطلاع نہیں دی گئی۔